Petit Prince is hier

Woensdag 14 Januarie 2009 het die prins sy opwagting gemaak. ‘n Volle 4.68kg en 53cm in lengte.

Op 2008

Oor 5 weke verander die kraal. Skielik word ‘n nuweling verwelkom. Mev Rendier sukkel onder die gewig, so die bielietjie gaan groot wees.

Ek groet tot die nuwe jaar. Geniet die feestyd.

5 JAAR VAN VREUGDE

Dankie my lief.

Dit pla my…

As musici ander musici se kreatiwiteit misbruik.

Voorbeeld:
Leon Schuster – Hie kommie bokke (La cucaracha)

Slapstick humor het sy plek, so die “genre” het ‘n mark.

Danie Botha – ’n Christen weet nie van verloor af nie. (Blou Bul song)

Dis af man! Vir wat wil jy nou sulke gemors aanvang?

Steve Hofmeyr – God se Bedelaar(St. Elmo’s Fire)  God se bedelaar – Steve Hofmeyr

Gisteraand was ons by die Waarmaker konsert in Stellenbosch. Die saal was groot, maar tog was die mense min. Die klank was oordonderend, die beligting verblindend. Als loop goed af, totdat Steve met die song begin. Dis St. Elmo’s Fire, met Afrikaanse woorde(wat ek nou nog nie alles kan uitmaak nie), maar my hemel man, Hoekom??? Sekerlik het ‘n man soos Steve meer kreatiwiteit as om op ‘n ander man se tune nuwe woorde te sit?

Daar is mense wat die Aussies afkraak as ‘n “common” klomp. Gisteraand vra Mev Rendier vir my by die konsert, wat sou ‘n Aussie dink van die gemiddelde deursnee mens (Afrikaner) wat ‘n Steve Hofmeyr konsert bywoon…laat mens dink.

Die einde is in sig…

Oor 2 dae,10 September 2008, kom die wêreld tot ‘n einde, of dit is ten minste wat ‘n seker groep probeer sê het in ‘n aansoek by die Europese Menseregtehof om die aktivering van die LHC te stop. Wetenskaplikes poog om ‘n botsing te veroorsaak wat die tydperk direk na die Oerknal naboots. Niemand weet wat die uitkoms van hierdie eksperiment gaan wees nie, selfs nie die wetenskaplikes wat dit aanpak nie.
So maak julle reg. Gaan wild. Hou ‘n groot opskop môreaand, want die einde is in sig.

link:www.youtube.com/watch?v=cGqroT1FZ5Y

White Water Lodge – Stanford

Mev Rendier het ons onlangs verras met ‘n naweek weg na die White Water Lodge net buite Stanford. Vrydagmiddag vroeg het ons sak en pak die pad Overberg toe aangepak. Nina het mooi soet agter in die kar gesit en met Barney in my agterkop het ons die stof pad na die lodge bereik. Nina was verskriklik opgewonde oor die koeie, skape en bokke langs die pad. Die lodge self het ‘n paar dwerg perde wat baie vriendelik is.

Daar aangekom en ons word begroet deur die mooiste blyplek wat ek in ‘n lang tyd gesien het.

Die luukshede in die 1846 House is onbeskryflik. Die kamers is pragtig uitgelê, met en suite badkamers. Die kuier areas is enorm groot met ‘n lekker kaggel vuur(en oorgenoeg hout) om jou deur die natste, koudste aande te kry. Die kombuis is enige kok se droom!

Die lodge het ook 3 damme met reënboog forelle en kleinbek baars in en daar is ‘n ook ‘n gedeelte van die Kleinrivier wat beskikbaar is om vir kleinbek baars te hengel. Ander aktiwiteite bestaan uit staproetes, quad bike uitstappies en net doodgewone ontspanning. Die gronde huisves heelwat voëls, waaronder 3 visarende. 

Die hengel is nie die moeilikste nie, maar met die weer wat ons oor die naweek beleef het, was dit nie die maklikste plek om ‘n vlieg deur die lug te stuur nie. Ons was gelukkig die ergste van die storm gespaar, so Vrydagmiddag en Saterdag kon ons die water aandurf. Sondag was die storm in volle swang en moes ons koers kies huistoe.

Gaan maak gerus ‘n draai by die White Water Lodge. Dis ‘n naweek weg wat enige siel sal verkwik.

Skandaal?

Ek het nie veel van die Olimpiese Spele gevolg nie, maar het wel van die Phelps-fenomeen gehoor. Nou steek daar ‘n lelike ding sy kop uit:

http://100thofasecond.com

Kan dit suur druiwe wees?